Home News / ዜና የውሃ አለመኖር ለ40/60 የጋራ መኖሪያ ቤት እድለኞች ፈተና ሆኗል

የውሃ አለመኖር ለ40/60 የጋራ መኖሪያ ቤት እድለኞች ፈተና ሆኗል

የክራውን እና ሰንጋተራ የ40/60 የጋራ መኖሪያ ቤት እድለኞች ቁልፍ ከተረከብን ሶስት ወር ቢያልፍም ውሃ ባለመኖሩ እስከሁን ወደቤቶቹ መግባትና የሚሟሉ ስራዎች መስራት አልቻልንም የሚል ቅሬታ አቅርበዋል።

በሰንጋ ተራ እና በክራውን ሳይት የተገነቡ 972 የ40/60 ጋራ መኖሪያ ቤቶች ባለፈው ሀምሌ ወር ለእድለኞች ተላልፈዋል።

ፋና ብሮድካስቲንግ ኮርፖሬት በሁለቱም ሳይቶች ባደረገው ቅኝት ግን የቤቶቹ እድለኞች እንዳልገቡ ያረጋገጠ ሲሆን፥ ለምን ወደ ደረሳቸው ቤት እንዳልገቡ ጠይቋል።

የውሃ አለመኖር ወደ ቤታቸው ለመግባትም ትልቅ ችግር መሆኑን ነው በሰጡን ምላሽ ያነሱት።

የቤት ባለቤቶቹ አንዳንድ ስራዎችን ለማከናወን መቸገራቸውን የተናገሩ ሲሆን፥ ውሃ ከሩቅ ቦታ እያስመጡ እንደሚጠቀሙ በቅኝታችን አስተውለናል።

በሰንጋተራ የውሀ ታንከሮቹ ሙሉ ውሃ ቢኖራቸውም የውሀ ቆጣሪዎች ባለመኖራቸው ውሃውን ማግኘት አልተቻለም።

በክራውን ሳይትም የውሃ ቆጣሪዎቹ አለመገጠማቸው እንዳለ ሆኖ የውሃ ፓምፖች አለመገጠምም ሌላው ችግር ነው።

ለቤቶቹ የውሃ አገልግሎትን የመስጠት ሃላፊነት ያለው የአዲስ አበባ ውሀ እና ፍሳሽ ባለሰልጣን የኮሙዩኒኬሽን ጉዳዮች የስራ ሂደት መሪ አቶ እስጢፋኖስ በስራት፥ እስካሁን የውሃ ቆጣሪዎቹን ከውጭ ለማስመጣት ሂደት በመዘግየቱ ለችግሩ በምክንያትነት አስቀምጠዋል።

አሁን ግን የውሃ ቆጣሪዎቹን የመግጠም ስራ መጀመሩን ገልፀዋል።

በሰንጋተራ ቆጣሪ ለመውሰድ ከተመዘገቡት 85 ባለቤቶች ውስጥ ለ71 ነዋሪዎች ቆጣሪዎቹ መገጠማቸውን ጠቁመዋል።

በክራውን ሳይትም እንዲሁ በተመሳሳይ ቆጣሪ ለመውሰድ ጥያቄ ካቀረቡት 397 ሰዎች ለ50ዎቹ ተገጥሞላቸዋል።

ቆጣሪዎቹ በሁለቱም ሳይቶች ውስጥ የሚገጠሙ ቢሆንም፥ ባለቤቶቹ በቤታቸው ተገኝተው ማስገጠም እንደሚገባቸው እና ጥያቄ እንዳቀረቡም ቆጣሪዎቹ ወዲያውኑ እንደሚገጠሙላቸው ነው አቶ እስጢፋኖስ የተናገሩት።

በሁለቱም ሳይቶች ያለውን የውሃ ችግር ለመቅረፍ ግን ቆጣሪ ከመግጠም ውጭ ውሃ እንዳያገኙ የሚያደርጋቸው ሌላ ችግር መኖሩን ባለስልጣኑ አሳውቋል።

ሰንጋተራ ከብሎክ ሶስት ውጭ ያሉት ህንፃዎች የውሃ ግፊት የሚሰጥ ፓምፕ ስላልተገጠመላቸው፥ ባለቤቶቹ ውሃ ማግኘት እንደማይችሉ ነው የተገለጸው።

በክራውን ሳይትም ቢሆን የውሃ ፓምፖቹ እስካሁን ባለመገጠማቸው ቆጣሪዎቹ ቢገጠሙም ነዋሪዎቹ ውሃ ማግኘት እንደማይችሉ አቶ እስጢፋኖስ አብራርተዋል።

ይህ ችግር እንዳይፈጠር ቀድሞ ስራዎቹን ማጠናቀቅ ይገባው የነበረው የአዲስ አበባ ከተማ ቁጠባ ቤቶች ኢንተርፕራይዝ፥ የውሀ ፓምፖቹን በጊዜው ላለመገጠማቸው ከግንባታ ጋር የተያያዙ ምክንያቶችን አንስቷል።

የኢንተርፕራይዙ የግንባታ ዘርፍ ምክትል ስራ አስኪያጅ ወይዘሮ ጀሚላ አህመድ፥ ነዋሪዎቹ በአፋጣኝ ውሃ እንዲያገኙ ፓምፖቹን የማስገጠም ስራዎችን በአጭር ጊዜ ለማጠናቀቅ እቅድ ተይዞ እየተሰራ ነው ብለዋል።

ምንጭ – ፋና

LEAVE A REPLY

Please enter your comment!
Please enter your name here